2023年12月9日至12月10日嘅週末，我為咗去東京巨蛋睇《異次元Fes Idolm@ster★♡Love Live! 歌合戰》演唱會，快閃咗一次東京，今次呢篇正式向大家分享演唱會嘅感想！
(為咗更生動傳神咁表達，呢篇係會用口語寫嘅~)
呢個演唱會係乜東東？
Idolmaster同LoveLive! 係日本兩大跨次元偶像企劃，佢哋本身係音樂遊戲，然後製作動畫、漫畫，再跨次元到舉辦真人演唱會。本身係遊戲動漫，咁真人演唱會係邊個演出呢？答案就係為角色配音嘅聲優！兩個企劃，各自都舉辦過無數場演唱會，今次首度聯手合作，可以話係有今生、無來世！竟然有朋友班到門票，真係幾艱難都要飛去睇！
去之前嘅期望？
其實我要求好簡單，只係想目睹欣賞嘅聲優嘅身姿。今次演唱會中出場嘅7大偶團之中，只有LoveLive! 嘅「虹咲學園偶像同好會」(簡稱「虹團」) 我係跟得足，其餘LoveLive!團隊只可以話係略知一二， Idolmaster方面更加只係聽過愛美(飾演Million Live嘅Julia)嘅歌。
會場內外雜攝
東京巨蛋係日本職棒巨人隊嘅主場，充滿霸氣的歷屆冠軍直幡旁邊，係霸氣得嚟有少少唔同嘅偶像女團直幡，總覺得好有喜感 (笑
12月9日及12月10日，東京巨蛋唔打棒球！
入閘後
會場內盛況，人數多到一個點 (兩日共9萬現場觀眾，即係呢度成4萬幾人 @@)
正式開場後嘅感受？
「Wow!」開場有幾首炒熱氣氛嘅快歌，fans打call聲雷動全場，個個都好熟練呢啲必要曲目，我感覺自己未跟到個節奏。但好快地我放開心情讓四肢同聲帶跟隨住周圍就好，情緒都跟住high上嚟，感覺極正！
雖然一開波有少少唔適應，但其實今次唔算係我第一次置身呢種場境。早於2018年時，我參加過LoveLive! 電影劇場版嘅應援場，當時入場嘅fans同樣全副武裝，帶哂penlight同螢光棒打call歡呼。只不過喺戲院入面我仲係可以安坐喺座位睇大家，嚟到演唱會，就唔止係睇台上聲優表演，要積極參與其中！
難忘嘅時刻？(文末附詳細版)
1. 「虹團」我推：村上奈津實solo出場！我頗欣賞嘅內田秀、林鼓子、前田佳織里、指出毬亞亦在今日solo陣容內！
2. Million Live《ジャングル☆パーティー (Jungle Party)》最強party song，全場不論邊邊fans一齊開心大嗌「U-HA-HA!」
3. Aquors 《WATER BLUE NEW WORLD》壓倒性嘅高質演出，綜合歌唱力、舞步、衣裝各方面均無懈可撃！
4. Liella!! Syncri5e小隊 《Dancing Rapsberry》5人高同步率型格歌舞演出，show後我直接跳坑睇動畫！
5. Million Live、Aquours合唱《さよならアンドロメダ (再見仙女座)》，燈光組大顯身手，在柔和歌聲下將東京巨蛋化為星河！
6. 跨企劃合唱《繚乱！ビクトリーロード (繚亂！Victory Road)》，各團的成員穿著特攻服在rap！Idolmaster嘅fans 先係嚇窒，然後瘋狂high爆！
7. 跨企劃合唱《コットンキャンディえいえいおー！ (Conton Candy Ei Ei Oh~!》，觀眾終於有機會參與呢首meme級神曲！
見證歷史
Idolmaster同LoveLive! 合作搞演唱會，本來已經夠歷史性，但今晚嘅演唱會，仲重現咗一個經典場面：LoveLive! 元祖μ’s 團《Snow Halation》嘅橘色奇蹟。Fans應援呢首歌時，前半部需要將penlight著白色，到最後一節副歌時，全場penlight改著橙色配合歌曲高潮。7年前LoveLive! μ’s Final LoveLive!正正係喺東京巨蛋舉行，而該次亦係μ’s 團最後一次單獨演唱會，今次東京巨蛋再度喺《Snow Halation》嘅歌聲下染成一片橙海，可謂別具意義，係真正嘅奇蹟。
其實我都算做經歷過一次《Snow Halation》嘅橘色奇蹟，就係頭先提過嘅LoveLive! 電影劇場版！電影響起《Snow Halation》時，戲院內嘅fans同樣著起橙色penlight同螢光棒。
坦白講，喺今次異次元Fes演唱《Snow Halation》時，我都未知原來自己已經置身歷史當中，甚至penlight轉色反應都慢咗。但呢啲都唔緊要，最值得慶幸嘅係，我有嚟到呢場live，有好好享受嗰一刻。
官方剪輯嘅精華片段：
後記
呢場live真係好特別，唔淨止頭先講過嘅跨企劃合作、經典重現呢啲客觀部份，而係我再一次體會到，偶團演唱會嘅觀眾參與度係十分之高，甚至可以話觀眾都融入埋表演一部份，全程都一齊嗌、一齊揮penlight，只要台上有人唱緊，觀眾就唔會坐低。雖然我以往絕少去演唱會，但我會話我好享受呢種形式嘅表演，真心覺得好玩。
睇呢場live的確係好奢侈，話雖係淡季，但一張東京來回機票只係去2日1夜，點都係大嘥鬼。不過基於呢場live嘅精彩、難得、難忘嘅程度，只要買到參與其中嘅機會，今次嘅付出係值得嘅。尤其2024年3月12日抽選宇多田光日本巡迴演唱會門票失敗之後，我更加感受到，有機會去外地睇live其實係十分十分唔容易，抽到飛又喺能力所及範圍內嘅都應該盡力去。呢啲人生中獨一無二嘅體驗機會，最抵死嘅地方係，如果你錯過咗，你根本連有幾可惜都意識唔到，只有你身處喺入面，先會識得慶幸自己無錯過到。
***************************************************
演出感想詳細版
「虹團」幾位我欣賞嘅聲優，包括首推嘅村上奈津實，同埋另外幾位包括內田秀、林鼓子、前田佳織里、指出毬亞都喺Day 2 solo登場。「虹團」主打solo曲，但如此龐大規模嘅演唱會中，無奈只可安排佢哋唱半首，所以表現機會其實少咗。
Idolmaster嘅愛美雖然只參與團唱，無緣聽到solo曲《Star Trip》，但經驗豐富嘅佢一貫台型十足，好識帶動氣氛。例如Million Live嘅《ジャングル☆パーティー (Jungle Party)》，本身有好多動物擬聲詞畀fans打call跟住嗌，氣氛已經十分歡樂，愛美喺間奏時大嗌「東京ドームのみな最高！(東京巨蛋的大家最棒了！)」，更加令全場情緒高脹。事後睇返，有好多唔識Idolmaster嘅LoveLive! fans，紛紛表示玩得好開心。
綜合實力計，我印象最深刻嘅歌曲係LoveLive! Aquors (簡稱「水團」)嘅《WATER BLUE NEW WORLD》，現場壓倒性嘅演出，令我睇到目瞪口呆，penlight都唔識揮。水團多位聲優唱功都好好，Centre位嘅伊波杏樹表演極度投入、表情配合歌詞帶出非一般感染力，而舞步方面，即使運動量大、走動範圍廣，9位團員一樣夾得好齊，整體水準十分之高。
Love Live! Liella!! (簡稱「星團」)嘅unit：Syncri5e嘅《Dancing Rapsberry》，亦係跳舞方面表現突出。歌曲行型格路線，5位小隊成員動作利落、有力，舞步編排帶來嘅視覺立體感極佳，亦有好多Liella!!特色嘅細緻動作。呢次嘅演出，成功令我入坑追睇返星團嘅動畫。
演唱會後段開始有較多跨企劃合唱歌曲，其中由嘅Million Live同Aquours兩團合唱嘅《さよならアンドロメダ (再見仙女座)》，除咗有勁多唱得之人外，燈光效果亦應記一功。燈光編排善用東京巨蛋圓型頂部，直接將觀眾帶到去一片廣闊星空，歌曲最尾時，舞台上方射燈由下而上照到看台底部水平，喺看台上嘅人就彷彿見到用光茫搭起，架向星空嘅舞台，夢幻非常。
但真正好戲而家先至上演。正如瀨尿牛丸唔爆，不如分開返瀨尿蝦同牛丸各自食。既然係兩大偶像企劃嘅合作演唱會，合作曲目就要夠精彩先對得住觀眾。尾段《繚乱！ビクトリーロード (繚亂！Victory Road)》同《コットンキャンディえいえいおー！ (Conton Candy Ei Ei Oh~!》打出重鎚組合拳，直接令全場觀眾high到上天堂。《繚亂！Victory Road》本來係「虹團」嘅角色介紹歌，用上電音曲風配rap詞演繹，貫徹「虹團」破格思維。官方大膽起用呢首歌，安排Idolmaster及LoveLive!不同成員著上特攻服(暴走族嘅衣著)，揮舞光劍，仲好有心將rap詞改為介紹其他團嘅成員！至於 《Conton Candy Ei Ei Oh~!》則係「水團」嘅經典meme song，明明係訴說對棉花糖的喜愛的可愛歌曲，卻以畫風崩壞暴走嘅MV聞名，由「水團」降幡愛領銜，帶領Idolmaster Million Live U149嘅聲優表演。每當唱到副歌，全場觀眾不論Idolmaster及LoveLive! fans大嗌「Ei! Ei! Oh~!」，氣勢一時無兩！
睇返live後Idolmaster及Love Live兩批fans嘅回響，今次跨企劃演唱會難能可貴嘅地方，在於就算唔識另一邊嘅fans (好似我咁)，同樣可以樂在其中，係一場成功嘅祭典。
